puchho na ye firaq men kya tera haal hai
marna kamal-e-sahal hai jiina muhal hai
ye husn huur ka na pari ka jamal hai
ḳhuban-e-dahr men to adim-ul-misal hai
ai jazb-e-ishq sirf ye tera kamal hai
un ka mujhe ḳhayal unhen mera ḳhayal hai
bimar-e-dard-o-gham ki haqiqat na puchhiye
kal aur haal us ka tha aaj aur haal hai
ik chaudhvin ke chand par hi munhasir nahin
yunhi har ek shai ko uruj-o-zaval hai
vaqif hain mehr-o-mah ki haqiqat se ḳhuub ham
is men tira jalal hai is men jamal hai
mirriḳh kanpta hai tumhare jalal se
tum se mila.e aankh ye kis ki majal hai
kar dunga sard nar-e-jahannam ko hashr men
kaafi use mira araq-e-infi.al hai
us sarv-qad ke qad se hai jis aadmi ko ishq
sarsabz hai vo baagh jahan men nihal hai
ai shaiḳh salsabil ho ya ho do-atisha
piina koi haram nahin hai halal hai
‘sabir’ tira kalam sunen kyuun na ahl-e-fan
bandish ajab hai aur ajab bol-chal hai
Leave a Reply