Altaf Hussain Hali
vasl ka us ke dil-e-zar tamanna.i hai
na mulaqat hai jis se na shanasa.i hai
qat.a ummid ne dil kar diye yaksu sad shukr
shakl muddat men ye allah ne dikhla.i hai
quvvat-e-dast-e-ḳhuda.i hai shakeba.i men
vaqt jab aa ke paḌa hai yahi kaam aa.i hai
Dar nahin ghair ka jo kuchh hai so apna Dar hai
ham ne jab khaa.i hai apne hi se zak khaa.i hai
nashe men chuur na hon jhanjh men maḳhmur na hon
pand ye pir-e-ḳharabat ne farma.i hai
nazar aati nahin ab dil men tamanna koi
baad muddat ke tamanna miri bar aa.i hai
baat sachchi kahi aur ungliyan uTThin sab ki
sach men ‘hali’ koi rusva.i si rusva.i hai
Leave a Reply