na kal tak the vo munh lagane ke qabil
hue aaj baten banane ke qabil
tiri bandagi aur siyahkar mujh sa
ye sar aur tire astane ke qabil
lab-e-zaḳhm-e-dil par ye hai shor qatil
tiri tegh ka phal hai khane ke qabil
nikale sanam peT se paanv tum ne
hue jab kahin ane-jane ke qabil
dil-e-bul-havas la.eq-e-dagh-e-ulfat
ye darham na the is ḳhazane ke qabil
un a.ina-ruyon ki ulfat ne ai dil
na rakkha hamen munh dikhane ke qabil
yahan sau hain khaTke chalo is chaman se
nahin ye jagah ashiyane ke qabil
patange hain gustaḳh ai sham.a-paikar
nahin teri mahfil men aane ke qabil
koi us ke duzd-e-hina se ye kah de
mira naqd-e-dil hai churane ke qabil
kabhi ḳhuun men mere bhi haath tar kar
ye mehndi hai tere lagane ke qabil
falak kya rulaya karega hamesha
kabhi ham bhi honge hansane ke qabil
mariz-e-mohabbat tumhara hai laghar
nahin yaar furqat uThane ke qabil
kise dekhen ham aur dikhla.en kis ko
na ab dekhne ne dikhane ke qabil
ghash ustadiyon par hain janen na puchhen
‘qalaq’ aise hain is zamane ke qabil
Leave a Reply