Waqt Ke Katahre Mein

suno tumhara jurm tumhari kamzori hai

apne jurm pe

rang-birange lafzon ki be-jan ridaen mat Daalo

suno tumhare khvab tumhara jurm nahin hain

tum khvabon ki taabir se Dar kar

lafzon ki tarik gupha men chhup rahne ke mujrim ho

tum ne havaon ke ziine par

paanv rakh kar

qaus-e-quzah ke rang samete

aur khalaon men udte

farzi taron sayyaron ki baten kiin

tum mujrim ho us nannhi konpal ke jis ne

subh ki pahli shokh kiran se sargoshi ki

tum mujrim ho us angan ke jis men shayad

ab bhi tumhare bachpan ki maasum shararat zinda hai

tum mujrim ho tum ne apne paanv se lipti mitti ko

ek izafi chiiz samajh kar jhaad diya

Leave a Comment