vaqf kar ke zindagi ki sa.aten tere liye
apne sar liin main ne kya kya afaten tere liye
kar liya nazzara-e-husn apni ankhon par haram
main ne radd kar diin nazar ki davaten tere liye
tere milne ke liye mumkin thiin jitni suraten
main ne kar Dalin vo saari suraten tere liye
dushmanon ki phabtiyan aur doston ki la.an-ta.an
oḌh liin duniya ki saari la.anten tere liye
baiTh kar teri gali men baiThne valon ke paas
ḳhaak kar liin apni shaḳhsi azmaten tere liye
apni izzat aap karne ka bhi jin ko haq nahin
main ne un logon ki ki hain izzaten tere liye
apni ḳhidmat jin se lene main sharafat ko ho aar
ki hain un logon ki main ne ḳhidmaten tere liye
kal jo meri minnaten karte the apne vaste
aaj main karta huun un ki minnaten tere liye
tere qadmon ke siva un ki talafi hi nahin
main jo bardasht ki hain zillaten tere liye
mujh ko jin ki qismaton ne kar rakha tha pa.emal
raund Dalin main ne un ki qismaten tere liye
jin mazaron par ḳhuda ke manne vaale na jaa.en
main ne un par ja ke manin minnaten tere liye
kufr sharmata hai jin se jhenpta hai jin se shirk
main ne ki hain kaisi kaisi bid.aten tere liye
amilon ne farz paḌhva diin namazen saikḌon
do ki chaar aur chaar ki do rak.aten tere liye
rahat-e-darain men bhi vo ḳhushi mafqud hai
jis ḳhushi se main ne jhelin afaten tere liye
jin men hota tha mire dil par nuzul-e-vahi-e-sher
vaqf-e-ah-o-nala hain vo sa.aten tere liye
kaash tu likkhe ki ‘bismil’ kuchh ḳhabar bhi hai tujhe
kis qadar ghamgin hain meri ḳhalvaten tere liye
Leave a Reply