Waiz-E-Tund-KHu Ko De Baada-O-Jam Saqiya

Poet

va.iz-e-tund-ḳhu ko de bada-o-jam saqiya

taaki vo hosh men kare tujh se kalam saqiya

saare ḳhatib shahar ke tere ḳhilaf ho ga.e

tera nasib ho ga.i shohrat-e-am saqiya

ham ko bhi kuchh pata chale bazm men kaun kaun hai

aaj ata-e-jam ho nam-ba-nam saqiya

tu ne kaha to ro diye tu ne kaha to hans diye

shahar ke saare bada-kash tere ghulam saqiya

dasht tujhe dikha.enge ḳhaak tiri uḌa.enge

ahl-e-junun ne likh liya tera bhi naam saqiya

ham ne suna hai tera bhi charagaron men naam hai

tujh se paḌega ek din ham ko bhi kaam saqiya

daftar-e-kotval men likkha hua hai aj-kal

tera bhi naam saqiya mera bhi naam saqiya