udasi ke piile darakhton ki shakhon se chipke hue
sabz patton men tera tajassus
mire jism ki tutti sarhadon par
khayalon ke sayon ko rusva karega
kuen ke andhere ki bhigi hui
jamuni aankh ki gol chiknai ke
surkh khvabon ke andar
javan lams ke ek jangali kabutar ke
phaile hue par ufuq ko chhuvenge
mujhe band kamre men baitha hua dekh kar
gol khidki ke shishon pe
barish ke qatron ki ankhen khulengi
koi marmarin haath thandi hava men
mujhe apni janib bulaega lekin
mujhe khauf hai tera piila tajassus
samundar pe phaili hui suraji shaam ki sidhiyon se
tujhe khud-kushi ki taraf le na jaae
Leave a Reply