Is Aalam-E-Viran Mein Kya Anjuman-Arai

is ālam-e-vīrāñ meñ kyā anjuman-ārā.ī

do roz kī mahfil hai ik umr kī tanhā.ī

phailī haiñ fazāoñ meñ is tarah tirī yādeñ

jis samt nazar uTThī āvāz tirī aa.ī

ik naaz bhare dil meñ ye ishq kā hañgāma

ik gosha-e-ḳhalvat meñ ye dasht kī pahnā.ī

auroñ kī mohabbat ke dohrā.e haiñ afsāne

baat apnī mohabbat kī hoñToñ pe nahīñ aa.ī

afsūn-e-tamannā se bedār huī āḳhir

kuchh husn meñ be-tābī kuchh ishq meñ zebā.ī

vo mast nigāheñ haiñ yā vajd meñ raqsāñ hai

tasnīm kī lahroñ meñ firdaus kī ra.anā.ī

in madh-bharī ā.ankhoñ meñ kyā sehr ‘tabassum’ thā

nazroñ meñ mohabbat kī duniyā hī simaT aa.ī

Leave a Comment