Is Aalam-E-Viran Mein Kya Anjuman-Arai

Sufi Tabassum

is alam-e-viran men kya anjuman-ara.i

do roz ki mahfil hai ik umr ki tanha.i

phaili hain fazaon men is tarah tiri yaden

jis samt nazar uTThi avaz tiri aa.i

ik naaz bhare dil men ye ishq ka hangama

ik gosha-e-ḳhalvat men ye dasht ki pahna.i

auron ki mohabbat ke dohra.e hain afsane

baat apni mohabbat ki honTon pe nahin aa.i

afsun-e-tamanna se bedar hui aḳhir

kuchh husn men be-tabi kuchh ishq men zeba.i

vo mast nigahen hain ya vajd men raqsan hai

tasnim ki lahron men firdaus ki ra.ana.i

in madh-bhari a.ankhon men kya sehr ‘tabassum’ tha

nazron men mohabbat ki duniya hi simaT aa.i