vahshaten kaisi hain khvabon se ulajhta kya hai
ek duniya hai akeli tu hi tanha kya hai
daad de zarf-e-samaat to karam hai varna
tishnagi hai miri avaz ki naghma kya hai
bolta hai koi har-an lahu men mere
par dikhai nahin deta ye tamasha kya hai
jis tamanna men guzarti hai javani meri
main ne ab tak nahin jaana vo tamanna kya hai
ye miri ruuh ka ehsas hai ankhen kya hain
ye miri zaat ka aina hai chehra kya hai
kaash dekho kabhi tuute hue ainon ko
dil shikasta ho to phir apna paraya kya hai
zindagi ki ai kadi dhuup bacha le mujh ko
pichhe pichhe ye mire maut ka saaya kya hai
Leave a Reply