jab raat sanvarti hai lamhon ki ravani men
ik chand utarta hai tab jhiil ke paani men
is aḳhiri paare men go zikr nahin varna
aghaz men ai logo main bhi tha kahani men
chehre pe buzurgi ke asarat batate hain
ik saneha tujh par bhi guzra hai javani men
dikhne men ba-zahir to ik aam sa pauda hai
kuchh ḳhaas to hai lekin us raat ki raani men
kal raat jo yadon ke hamrah nazar Daali
kuchh rang na.e dekhe tasvir purani men
har ek ḳhushi main ne saughat use kar di
par us ne diya mujh ko bas dard nishani men
is shahr ka har baasi nalan hai ‘zaki’ mujh se
ab to hai baqa apni bas naql-e-makani men
Leave a Reply