Tauseef Tabassum
vahima hoga yahan koi na aaya hoga
mere saaya hi mire jism se lipTa hoga
chand ki tarf nigahon men liye ḳhvab-e-tarab
aur ik umr abhi ḳhaak pe sona hoga
ashk aa.e hain to ye sair-e-charaghan bhi sahi
is se aage to vahi ḳhuun ka dariya hoga
gar kabhi TuuTi badalti hui rut ki zanjir
ek ik phuul yahan ḳhud ko tarasta hoga
ham to vabasta rahe tujh se ki hai ḳhu-e-vafa
tu ne kya soch ke ai gham hamen chaha hoga
shauq-e-ta.amir basa.ega ḳharabe kya kya
aadmi hai to har ik shahar men sahra hoga
saa.e mahke hue goshon men simaT ja.enge
chand niklega to ye shahr akela hoga
yaad a.engi bahut niind se bojhal palken
shaam ke saath ye dukh aur ghanera hoga
us ko ankhon men chhupaoge batao kab tak
kya karoge jo vahi dekhne vaala hoga
Leave a Reply