Wahi Riwayat Gazida-Danish Wahi Hikayat Kitab Wali

Faza Ibn E Faizi

vahi rivayat gazida-danish vahi hikayat kitab vaali

rahi hain bas zer-e-dars tere kitaben pichhle nisab vaali

main apne lafzon ko apne fan ke lahu se sarsabz karne vaala

mira shu.ur ijtihad vaala miri nazar ehtisab vaali

chalo zara doston se mil len kise ḳhabar is ki phir kab aa.e

ye sub.h-e-gulgun ḳhayal vaali ye mushkbu-sham ḳhvab vaali

misal mujh gum-shuda nafas ki hai aisi hi jaise koi bachcha

purane baste men rakh ke phir bhuul jaa.e copy hisab vaali

mire liye to tira ilaqa hai shahr-e-mamnua jaisa lekin

khanDar khanDar zindagi ko main ne gali dikha di gulab vaali

mire ye afkar tere fikr-o-nazar ki tathir hain miri jaan

main hikmaten tujh ko de raha huun vahi ḳhuda ki kitab vaali

‘faza’ ki darvesh-e-harf hai dekhna zara us ka bankpan tum

qamis ḳhurshid-baḳht vaali kulah gardun-rikab vaali