vahi dasht-e-bala hai aur main huun
zamane ki hava hai aur main huun
tujhe ai ham-safar kaise sambhalun
pahaḌi rasta hai aur main huun
sukut-e-koh hai aur saya-e-dar
sada-e-ma-siva hai aur main huun
magar shaḳhon se patte gir rahe hain
vahi ab-o-hava hai aur main huun
ye saari barf girne do mujhi par
tapish sab se siva hai aur main huun
ka.i din se nasheman ḳhak-e-dil ka
sar-e-shaḳh-e-hava hai aur main huun
pahaḌon par kahin barish hui hai
zamin mahv-e-dua hai aur main huun
mujhe bhi kuchh na kuchh karna paḌega
zamana sar-phira hai aur main huun
Leave a Reply