Shahid Meer
minaron se uupar nikla divaron se paar hua
hadd-e-falak chhune ki dhun men ik zarra kohsar hua
chashm-e-basirat raah ki mish.al azm-e-javan patvar hua
sahil sahil jashn-e-tarab hai ek musafir paar hua
dil ke jazbe samne aa.e ḳhushbu ḳhvab dhuan ban kar
jitni dilkash soch thi us ki vaisa hi iz.har hua
ubhre ehsasat ke suraj yadon ke mahtab khule
ghazlon ka divan suhane mausam ka aḳhbar hua
jangal parbat nadiyan jharne yaad rahenge barson tak
is basti men husn hai jitna paband-e-ash.ar hua
Leave a Reply