vahi dagh-e-lala ki baat hai ki ba-nam-e-husn udhar ga.i
koi kya kahe ki kahan kahan tire ḳhal-e-ruḳh ki ḳhabar ga.i
koi haath dashna-e-jan-sitan koi haath marham-e-parniyan
ye to haath haath ki baat hai koi vaqt pa ke sanvar ga.i
vahi ek suud o ziyan ka gham jo mizaj-e-ishq se duur tha
vo tiri zaban pe bhi aa gaya to lagan hi ji ki bikhar ga.i
kisi ek silsila-e-vafa ki mata.a zulf-e-dota nahin
koi pech-o-tab-e-hava mile ki vo zulf ta-ba-kamar ga.i
ye shikayat-e-dar-o-bam kya ye rabat-e-kohna ki raat kya
koi be-charagh shab-e-vafa tire shahr men bhi guzar ga.i
isi zindagi ke hazar ufuq isi zindagi ke hazar ruḳh
isi ik ḳhayal ki rau thi vo jo tiri jabin pe bikhar ga.i
vo hazar shauq ki laghzishen magar ek lazzat-e-narasi
miri ashna-e-tarab nazar tire ruḳh pe aa ke Thahar ga.i
kabhi atish-e-ḳhas-o-ḳhar se bhi gulon ko zauq-e-numu mila
kabhi shaḳh-e-gul se lahak uThi vo sinan jo ta-ba-jigar ga.i
vo zaban-e-sarmad-e-be-dalil vo ḳharash-e-ḳhanjar-e-hukmaran
koi imtihan-e-dalil kya ki dilon men baat utar ga.i
vo gharib-e-shahr kahe bhi kya jo tiri zaban se hai be-ḳhabar
magar ek rah-e-suḳhan bhi hai ki ye zindagi hai jidhar ga.i
Leave a Reply