tasir-e-barq-e-husn jo un ke suḳhan men thi
ik larzish-e-ḳhafi mire saare badan men thi
vaan se nikal ke phir na faraghat hui nasib
asudgi ki jaan tiri anjuman men thi
ik rang-e-iltifat bhi us be-ruḳhi men tha
ik sadgi bhi us nigah-e-sahar fan men thi
mohtaj-e-bu-e-itr na tha jism-e-ḳhub-e-yar
ḳhushbu-e-dilbari thi jo us pairahan men thi
kuchh dil hi bujh gaya hai mira varna aaj kal
kaifiyat-e-bahar ki shiddat chaman men thi
malum ho ga.i mire dil ko rah-e-shauq
vo baat pyaar ki jo hunuz us dahan men thi
ghurbat ki sub.h men bhi nahin hai vo raushni
jo raushni ki sham-e-savad-e-vatan men thi
aish gudaz-e-dil bhi gham-e-ashiqi men tha
ik rahat-e-latif bhi zimn-e-mehan men thi
achchha hua ki ḳhatir-e-‘hasrat’ se haT ga.i
haibat si ik jo ḳhatra-e-dar-o-rasan men thi
Leave a Reply