Wahan Main Nahin Thi

faqat khali pinjra badan ka pada tha

aur nim-va in kivadon ki har charcharahat men

hairaniyan bolti thiin

zamin ki faza se

mujhe kis ne bahar Dhakela

falak tak miri dastaras kyuun nahin thi

na jaane main kab tak khala men bhatakti rahi thi

vahin par

munaqqash darichon men

sarsabz belen sutunon se lipti hui thiin

chamakte hue chhat ke fanus ki raushni men

belon ke patton ki ankhon men thahri nami

jhilmilane lagi thii!

magar sab ki nazren

saji tabalon par jami thiin

kisi ko khabar kab hui thi

vahan men nahin thi

Leave a Comment