mire shu.ur ko is tarah varghalaya gaya
koi vajud nahin tha magar dikhaya gaya
kisi tarah bhi na aseb-e-muflisi utra
dua bhi ki ga.i ta.aviz bhi pilaya gaya
na jaane kyon miri tashkil hi nahin ki ga.i
zamin ka chaak yunhi be-sabab ghumaya gaya
mujhe ḳhabar hai chhanake se TuuT ja.ega
main aa.ine ko agar der tak dikhaya gaya
na jaane pichhle janam kaun si ḳhata hui thi
ki is janam men mujhe aadmi banaya gaya
Leave a Reply