va.e-taqdir kya ye alamiya nahin
sab hain apne magar koi apna nahin
dida-o-dil ki sunsan sahra hue
dil men jazba to ankhon men sapna nahin
ishq ko tark karne men diqqat na thi
ishq ko mashghala ham ne samjha nahin
ab ke mujh se mila vo to aisa laga
vo hi chehra hai lekin vo chehra nahin
phunk raha hai badan kunj-e-tanha.i men
sar pe chhat hai magar maan ka saaya nahin
meri nazron men duniya bhi uqba bhi hai
aadmi huun main ‘at.har’ farishta nahin
Leave a Reply