Wada Us Mah-Ru Ke Aane Ka

vaada us mah-ru ke aane ka

ye nasiba siyah-khane ka

kah rahi hai nigah-e-duz-dida

rukh badalne ko hai zamane ka

zarre zarre men be-hijab hain vo

jin ko daava hai munh chhupane ka

hasil-e-umr hai shabab magar

ik yahi vaqt hai ganvane ka

chandni khamushi aur akhir shab

aa ki hai vaqt dil lagane ka

hai qayamat tire shabab ka rang

rang badlega phir zamane ka

teri ankhon ki ho na ho taqsir

naam rusva sharab-khane ka

rah gae ban ke ham sarapa gham

ye natija hai dil lagane ka

jis ka har lafz hai sarapa gham

main huun unvan us fasane ka

us ki badli hui nazar tauba

yuun badalta hai rukh zamane ka

dekhte hain hamen vo chhup chhup kar

parda rah jaae munh chhupane ka

kar diya khugar-e-sitam ‘akhtar’

ham pe ehsan hai zamane ka

Leave a Comment