Bhartendu Harishchandra
utha ke naaz se daman bhala kidhar ko chale
idhar to dekhiye bahr-e-khuda kidhar ko chale
miri nigahon men donon jahan hue tarik
ye aap khol ke zulf-e-dota kidhar ko chale
abhi to aae ho jaldi kahan hai jaane ki
utho na pahlu se thahro zara kidhar ko chale
khafa ho kis pe bhanven kyuun chadhi hain khair to hai
ye aap tegh pe dhar kar jila kidhar ko chale
musafiran-e-adam kuchh kaho azizon se
abhi to baithe the hai hai bhala kidhar ko chale
chadhi hain tevriyan kuchh hai mizha bhi jumbish men
khuda hi jaane ye tegh-e-ada kidhar ko chale
gaya jo main kahin bhule se un ke kuche men
to hans ke kahne lage hain ‘rasa’ kidhar ko chale
Leave a Reply