Siya Sachdev
uTha ke gham tira ai zindagi na ro.enge
hamara va.ada raha ab kabhi na ro.enge
ham apne siine pe rakh lenge zabt ka patthar
agar hai is men tumhari ḳhushi na ro.enge
hamare gham ne tumhen phir se kar diya hai udaas
tumhare samne ab ham kabhi na ro.enge
ham apni shiddat-e-ehsas ko chhupa lenge
suna ke apni kabhi bebasi na ro.enge
ghamon ka bojh uTha lenge ham akele hi
yaqin kijiye ham vaqa.i na ro.enge
Leave a Reply