us ko mil kar dekh shayad vo tira a.ina ho
gha.ebana hi tiri us ki shanasa.i na ho
mujh pe zahir hai tire ji men hain kya kya ḳhvahishen
baat aisi kar ki jis men teri rusva.i na ho
ehtiyatan dekhta chal apne saa.e ki taraf
is tarah shayad tujhe ehsas-e-tanha.i na ho
asman ik dasht ki surat sitare ret hain
to lab-e-dariya sarabon ka tamanna.i na ho
DhunDh ab kuchh bhagte logon men surat ashna
in bagulon men ga.e lamhon ki purva.i na ho
tha safar dar-pesh sahra ka girah men rakh diye
us ne kuchh kanTe ki uzr-e-abla-pa.i na ho
khinch lega abr se barish agar sabza hua
tu kisi ki chaah men be-kar sauda.i na ho
ham use chhukar yahi samjhe ki vo patthar nahin
is se baḌh kar aur kya kahiye jo bina.i na ho
khul ga.i hai aankh to chadar bana kar dekh le
tere kamre hi men in ḳhvabon ki ra.ana.i na ho
zaḳhm tere dil ki zinat hain unhen parde men rakh
koi na-mahram tire ghar ka tamasha.i na ho
aaj ‘shahid’ us ke darvaze pe paanv ruk ga.e
radio bajta tha main chaunka ki shahna.i na ho
Leave a Reply