Sitam Tu Karta Hai Lekin Dua Bhi Deta Hai

sitam tu karta hai lekin dua bhi deta hai

mira harif mujhe hausla bhi deta hai

hai jis ka ek tabassum qarar-e-jan apna

usi ka tarz-e-taghaful rula bhi deta hai

baja ki hijr ka aalam azaab hai yaaro

magar ye arsa-e-furqat maza bhi deta hai

hai dil-navaz ghazab ka magar ye sho.ala-e-ishq

kabhi shagufa-e-dil ko jala bhi deta hai

kabhi hai maut men pinhan najat ka pahlu

kabhi vo ziist ki surat saza bhi deta hai