aisi koyal na papihe ki hai pyari avaz
kya bhali lagti hai kanon ko tumhari avaz
jab mujhe tum ne pukara ye dua di main ne
rahe makke men madine men tumhari avaz
aap ke bol sunae vo hamen kya qudrat
aisi paida to kare koi sitari avaz
sun ke bismil hue ham naghma-sarai un ki
nahin maalum chhuri hai ki katari avaz
be-sure samne us ke rahe tambur-o-sitar
la ke taron ke juari ne sanvari avaz
is tarah roiye aansu faqat ankhon se bahen
munh se nikle na dam-e-girya-o-zari avaz
chutkiyon men na uda mujh ko mughanni batla
saaz ke parde men kis ki hai ye pyari avaz
aise naale kiye ham ne ki gala baith gaya
aai aafat vo gale par ki sidhari avaz
naach gaane men vo aalam hai jo dekhe vo kahe
sar-basar tum ho pari shoala hai saari avaz
‘bahr’ roe ho zarur aaj kisi ke liye tum
surkh surkh ankhen bhi hain aur hai bhari avaz
Leave a Reply