us ki qurbat men hua hai ye ḳhasara mera
aap paḌh lijiye har aankh men qissa mera
har na.i saans pe banta huun bigaḌ jaata huun
ye hava ḳhatm hi kar de na tamasha mera
ab to honTon pe kabhi phuul bhi khil jaate hain
aap ne in dinon dekha nahin chehra mera
main ne ro ro ke use ghair ka hone na diya
us bala-ḳhez ko zanjir tha girya mera
ab na.e dasht mujhe dekh ke Dar jaate hain
meri vahshat ne baḌha rakkha hai rutba mera
Leave a Reply