us kī qurbat meñ huā hai ye ḳhasārā merā
aap paḌh lījiye har aañkh meñ qissa merā
har na.ī saañs pe bantā huuñ bigaḌ jaatā huuñ
ye havā ḳhatm hī kar de na tamāsha merā
ab to hoñToñ pe kabhī phuul bhī khil jaate haiñ
aap ne in dinoñ dekhā nahīñ chehra merā
maiñ ne ro ro ke use ġhair kā hone na diyā
us balā-ḳhez ko zanjīr thā girya merā
ab na.e dasht mujhe dekh ke Dar jaate haiñ
merī vahshat ne baḌhā rakkhā hai rutba merā