jab baḌha dard ki maujon ka dabav sahab
meri sanson ki larazne lagi naav sahab
is se baḌh kar nahin afsurda-mizaji ka ilaaj
dil agar ro.e to auron ko hansao sahab
ghup andhere men ugata huun suḳhan ka suraj
be-sabab thoḌi hai raton se lagav sahab
jab nahin milti na.e zaḳhm ki saughat mujhe
chhil deta huun purana koi ghaav sahab
jis ki dana.i ne mansuḳh kiye hosh-o-havas
aise nadan pe patthar na uThao sahab
main ne us husn-e-mujassam ki ziyarat ki hai
meri ankhon ke zara daam lagao sahab
bijliyan vasl ki sanson pe girao sahab
ruḳh se bhigi hui zulfon ko haTao sahab
jaise sahraon men milte hain do pyase dariya
honT se honT kuchh is tarah milao sahab
dil mohabbat ki saqafat ka azal se hai amiin
is shahanshah ko nafrat na sikhao sahab
jiit kar jashn manana to hui aam si baat
haar kar bhi to kabhi jashn manao sahab
ham na.e ahd ke suqrat hain is baar hamen
zahr ka pyala nahin jaam pilao sahab
Leave a Reply