use to pas-e-ḳhulus-e-vafa zara bhi nahin
magar ye aas ka rishta ki TuTta bhi nahin
ghire hue hain ḳhamoshi ki barf men kab se
kisi ke paas koi tesha-e-sada bhi nahin
ma.al-e-ghunch-o-gul hai miri nigahon men
mujhe tabassum-e-kazib ka hausla bhi nahin
tulu-e-sub.h-e-azal se main DhunDhta tha jise
mila to hai pa miri samt dekhta bhi nahin
miri sada se bhi raftar tez thi us ki
mujhe gila bhi nahin hai jo vo ruka bhi nahin
bikhar ga.i hai nigahon ki raushni varna
nazar na aa.e vo itna to fasla bhi nahin
suna hai aaj ka mauzu-e-majlis-e-tanqid
vo sher hai ki abhi main ne jo kaha bhi nahin
simaT rahe hain sitaron ke fasle ‘anvar’
paḌosiyon ko magar koi janta bhi nahin
Leave a Reply