use paane ki karte ho dua to
magar us se bhi kal ji bhar gaya to
yaqinan aaj ham ik saath hote
agar karte zara sa hausla to
chale ho rahnuma kar ilm ko tum
tumhen is ilm ne bhaTka diya to
samajh sakte ho kya anjam hoga
tumhare vaar se vo bach gaya to
bahut masruf tha mahfil men maana
nahin kuchh bolta par dekhta to
kisi ko chahti hai puchh luun kya
javab is ka magar haan men mila to
main achchha huun tabhi apna rahi ho
koi mujh se bhi achchha mil gaya to
bahut nazdik mat aaya karo tum
kahin kuchh ho ga.i ham se ḳhata to
bahut se kaam kal karne hain mujh ko
magar ai zindagi kal na hua to
ghulami men jakaḌ lega koi phir
vatan aise hi gar luTta raha to
use phir kaun marega batao
gham-e-hijran ne bhi Thukra diya to
Leave a Reply