abbas-tabish

Use Maine Nahin Dekha

vo kaisi hai

use main ne nahin dekha

suna hai vo zamin-zadi

dhanak se apne khvabon ke ufuq gul-rang rakhti hai

mire khashak se aage kisi manzar men rahti hai

hava ke ghar men rahti hai

vo kis suraj ka hissa hai

vo kis taare ki mitti hai

use main ne nahin dekha

miri ankhon se le kar us ki ankhon tak kise maalum hai

kitne sitare hain

mujhe kya ilm vo kis rang ke kapde pahanti hai

vo khali bartanon men apna din kaise bitati hai

vo khushiyan DhunDti hai aur khud ko band almari men rakh kar

bhuul jaati hai

vo ghar ke lawn men baithi bahut kuchh sochti hogi

ki mera rang kaisa hai

miri ankhon ke raushan qumqumon men taab kitni hai

miri shiryan men sahme hue bachchon pe kya guzri

vo kis raste pe chal nikle ki apne ghar nahin pahunche

vo akasr sochti hogi

mire kamre men budhi fahisha tanhai ke hote

mire din kaise katte hain

miri be-khvab raten kin khayalon men guzarti hain

kahan ishq-e-gurezan ki kahani khatm hoti hai

vo ghar ke lawn men baithi yahi kuchh sochti hogi

ki mere naam ke pichhe miri tasvir kaisi hai

mire khat bhi nahin us ke tasarruf men

ki un ko khol kar mere badan ke raaz tak pahunche

mujhe us ne nahin dekha

na main ne us ko dekha hai

na us ne mujh ko dekha hai

magar apni mohabbat men ajab husn-e-tavazun hai

vo akasr sochti hogi

main kitna apne daftar men huun kitna ghar ki khalvat men

vo mujh ko mujh pe hi taqsim kar ke dekhti hogi

mujhe mahsus hota hai

koi dil chirti khushbu mujhe avaz deti hai

magar avaz ke pichhe koi chehra nahin hota

vo mujh ko dekh leti hai

magar meri basarat men mahak chehra nahin paati

ki khushbu kis ne dekhi hai

sada ko kis ne pakda hai

makani duriyan kaisi? zamani qurbaten kaisi?

vo mera jism hai lekin use main ne nahin dekha

More Poems

Leave a Comment