Jab Main Uske Ganw Se Bahar Nikla Tha

jab maiñ us ke gaañv se bāhar niklā thā

har raste ne merā rasta rokā thā

mujh ko yaad hai jab us ghar meñ aag lagī

uupar se bādal kā TukḌā guzrā thā

shaam huī aur sūraj ne ik hichkī lī

bas phir kyā thā kosoñ tak sannāTā thā

maiñ ne apne saare aañsū baḳhsh diye

bachche ne to ek hī paisa māñgā thā

shahr meñ aa kar paḌhne vaale bhuul ga.e

kis kī maañ ne kitnā zevar bechā thā

Leave a Comment