Aslam Kolsarii
jab main us ke gaanv se bahar nikla tha
har raste ne mera rasta roka tha
mujh ko yaad hai jab us ghar men aag lagi
uupar se badal ka TukḌa guzra tha
shaam hui aur suraj ne ik hichki li
bas phir kya tha koson tak sannaTa tha
main ne apne saare aansu baḳhsh diye
bachche ne to ek hi paisa manga tha
shahr men aa kar paḌhne vaale bhuul ga.e
kis ki maan ne kitna zevar becha tha
Leave a Reply