Kyun Na Kahen Bashar Ko Hum Aatish-O-Ab O Khak-O-Baad

kyuun na kahen bashar ko ham atish-o-ab o khak-o-bad

qudrat-e-haq se hain baham atish-o-ab o khak-o-bad

akhgar-e-ghuncha ab-ju gard-e-chaman nasim-e-subh

hain ye girah-kusha-e-gham atish-o-ab o khak-o-bad

huqqe ko ahl-e-maarifat kyun-ki na samjhen hamdam ab

ye bhi rakhe hai besh-o-kam atish-o-ab o khak-o-bad

sozish-e-dagh-o-abla gard-e-alam shumar-e-dam

hijr men charon hain baham atish-o-ab o khak-o-bad

barq-o-sahab o gard-bad dasht-e-junun men saath hain

hain ye mire rafiq-e-dam atish-o-ab o khak-o-bad

ru o araq ghubar-e-khat jumbish-e-zulf ki hava

charon hain dil ke haq men sam atish-o-ab o khak-o-bad

chashm men atishin hain ashk dil men ghubar-e-ah-e-sard

donon se lete hain janam atish-o-ab o khak-o-bad

mujh ko khudai ki qasam rakhte hain ghere dam-ba-dam

tere ye ishq men sanam atish-o-ab o khak-o-bad

kyuun na havas-e-khamsa gum ahl-e-sukhan ke hon ‘nasir’

tujh hi se bas hue raqam atish-o-ab o khak-o-bad

Leave a Comment