ham-nashin raat ki maghmum khamoshi men mujhe
duur kuchh dhimi si naghmon ki sada aati hai
jaise jaati hui afsurda javani ki pukar
jis ko sun sun ke miri ruuh laraz jaati hai
jaise ghatti hui maujon ka utarta hua shor
mutriba jaise koi duur nikal jaati hai
ya havaon ka tarannum kisi virane men
jaise tanhai men doshiza koi gaati hai
main bahut ghaur se naghmat suna karta huun
sach to ye hai ki miri jaan pe ban jaati hai
baar baar uth ke main jaata huun sadaon ki taraf
lekin ik shai hai jo vapas mujhe le aati hai
chaunk uthta huun jab us khvab se hairan ho kar
phir mujhe dusri duniya hi nazar aati hai
aah, vo bhuuk ke maare hue afrad hansen
jin ki surat pe qanaat bhi taras khati hai
jaise ujdi hui mahfil ke kuchh afsurda charagh
raushni men jinhen har gaam pe thukrati hai
aah vo hazrat-e-insan hi ka dard o sitam
jis ka izhar bhi karte hue sharm aati hai
vo tarane jo suna karta huun tanhai men
un taranon men mujhe bu-e-vafa aati hai
gaunga naghme vo taamir-e-mohabbat ke liye
mai-kada chhod diya jin ki ishaat ke liye
Leave a Reply