Qurban Aatish
ye shahr-e-gul ḳhash-o-ḳhashak ho gaya kaise
mujhe pata nahin ghamnak ho gaya kaise
jis aadmi ne kinara kabhi nahin dekha
samundaron ka vo tairak ho gaya kaise
kahin charagh ki maddham si raushni bhi nahin
to phir ye daman-e-shab chaak ho gaya kaise
zamana kahta raha jis ko umr bhar ahmaq
vo shaḳhs sahab-e-idrak ho gaya kaise
hava-e-tund ko is baat par ta.ajjub hai
charagh raah ka bebak ho gaya kaise
hava men koi sharar ka guman na tha ‘atish’
to phir shajar ka badan ḳhaak ho gaya kaise
Leave a Reply