Bahr-E-Hasti Koi Sarab Nahin

Altaf Mashhadi

bahr-e-hasti koi sarab nahin

zindagi zindagi hai ḳhvab nahin

aah insan jis ki ankhon par

apna anjam be-naqab nahin

ek ḳhurshid-ruḳh ki zulfon ka

raat ke paas kuchh javab nahin

zindagi dard se hui mahrum

mai-kada hai magar sharab nahin

mutrib-e-vaqt tere hathon men

kyon hai talvar aur rabab nahin

aadmi aadmi ka raziq hai

nazm-e-alam magar ḳharab nahin

haa.e ‘altaf’ vo hazin raten

jin ki qismat men mahtab nahin