Abdul Wahab Sukhan
us ka lahja karakht hota gaya
dil hamara bhi sakht hota gaya
zakhm ka ek nanha sa pauda
rafta rafta darakht hota gaya
tha safar yuun to be-sar-o-saman
shauq-e-manzil hi rakht hota gaya
rahbari ka har ik alam-bardar
khugar-e-taj-o-takht hota gaya
teri khatir samet kar rakkha
dil magar lakht lakht hota gaya
ishq men jis maqam se guzre
marhala aur sakht hota gaya
jis ne dekhe the khvab ujalon ke
vo ‘sukhan’ tira-bakht hota gaya
Leave a Reply