libas tan pe salamat hain haath ḳhali hain
ham ek mulk-e-ḳhuda-dad ke savali hain
na ham men aql-o-farasat na hikmat-o-tadbir
magar hai zo.am ki jam.iyyat-e-misali hain
munafiqat ne lahu tan men itna garmaya
ki guftugu men riya-kariyan saja li hain
ḳhud apne aap se kad is qadar hamen hai ki ab
rivayaten hi gulistan ki phunk Daali hain
hamare dil hain ab amaj-gah-e-hirs-o-havas
ki ham ne sinon men tarikiyan uga li hain
nashemanon ko ujaḌa kuchh is tarah jaise
ki faḳhta.en daraḳhton se uḌne vaali hain
kisi gharib apahij faqir ki ‘mohsin’
kisi amiir ne baisakhiyan chura li hain
Leave a Reply