us ka chehra bhi chamak men na misali nikla
chand suraj ke ujalon ka savali nikla
log samjha kiye mausam hi nahin uḌne ka
us ki uzlat ka sabab be-par-o-bali nikla
phuul to mil gaya ḳhushbu na magar haath lagi
us ko paane ka junun ḳham-ḳhayali nikla
barish-e-sang men bhi aa.i dua honTon par
sab ne kam-tar jise jaana tha vo aali nikla
be-hadaf tiir chalata raha koi ‘gulzar’
jab zarurat paḌi tarkash vahan ḳhali nikla
Leave a Reply