ek tasvir jalani hai abhi
haan magar aankh men paani hai abhi
us ne jab haath milaya to laga
dil men ik phans purani hai abhi
abhi baaqi hai bichhaḌna us se
na-mukammal ye kahani hai abhi
ai hava aisi bhi ujlat kya hai?
kya kahin aag lagani hai abhi
rasta rok rahi hai ik yaad
ye bhi divar girani hai abhi
ye jo patthar hain inhen TuTna hai
mere ashkon men ravani hai abhi
vaqt ye puchh raha hai ‘tariq’
gard kuchh aur uḌani hai abhi?
Leave a Reply