na diya bosa-e-lab kha ke qasam bhuul gae
de ke aisi mujhe eajaz ka dam bhuul gae
chashm-o-abru ko tire dekh ke aata hai khayal
taq-e-kisra pe yahan saghar-e-jam bhuul gae
ai shah-e-husn ye qalamen nahin aariz pe tire
katiban-e-khat-e-rukhsar qalam bhuul gae
vo bhi kya din the ki ashiq the tumhare ham bhi
ab to fariyad-o-fughan dard-o-alam bhuul gae
haae qismat ka likha aae to qasid ye kahe
khat tumhare liye vo kar ke raqam bhuul gae
tera gulzar hai kis baagh ki muuli bulbul
ku-e-janan men to ham bagh-e-iram bhuul gae
chashm-e-bad-dur vo ankhen hain tumhari sahab
dekh kar chaukdi ahu-e-haram bhuul gae
aap ka dost hai ye apni baghal ka dushman
yaad dilvae vahin dil ne jo ham bhuul gae
zaiqa maut ka bas yaad dila deta hai
kya qayamat hai ye kahna tira ham bhuul gae
mirza mahr-e-mohabbat tumhen phir yaad aai
dil pe guzri thi jo kuchh ranj-o-alam bhuul gae
rah gaya yaad tumhen jaur-o-jafa zulm-o-sitam
lutf-o-altaf-o-inayat-o-karam bhuul gae
kaaba-e-dil men bas ab rahti hai allah ki yaad
rasta dair ka ham shakl-e-sanam bhuul gae
yaad rahti hai faqat ham ko tire kucha ki
vaizon se suna hal-e-iram bhuul gae
yaad rakhne ki ye baten hain baja hai sach hai
aap bhule na hamen aap ko ham bhuul gae
dil se dil ko hai agar raah to hai yaad se yaad
tum hamen bhuul gae tum ko bhi ham bhuul gae
bas hamare hi liye aap ko nisyan bhi hai
kabhi ghairon ko na sahab koi dam bhuul gae
kucha-e-zulf men ya halqa-e-gesu men tire
yaad aata hai yahin dil kahin ham bhuul gae
sher-e-hindi jo sune ‘mehr’ jigar tafta ke
apna andaz-e-fasihan-e-ajam bhuul gae
Leave a Reply