us but ke pujari hain musalman hazaron
bigḌe hain isi kufr men iman hazaron
duniya hai ki un ke ruḳh o gesu pe miTi hai
hairan hazaron hain pareshan hazaron
tanha.i men bhi tere tasavvur ki badaulat
dil-bastagi-e-gham ke hain saman hazaron
ai shauq tiri pasti-e-himmat ka bura ho
mushkil hue jo kaam the asan hazaron
ankhon ne tujhe dekh liya ab unhen kya gham
halanki abhi dil ko hain arman hazaron
chhane hain tire ishq men ashufta-sari ne
duniya-e-musibat ke bayaban hazaron
ik baar tha sar gardan-e-‘hasrat’ pe rahenge
qatil tiri shamshir ke ehsan hazaron
Leave a Reply