aaj kya hai jo mila shokh nigahon ko qarar?
kya hua husn ki maasum hayaon ka vaqar
aaj kyuun tum mujhe dekhe hi chale jaate ho?
dafatan tuut gaya kis liye bajta hua saaz
kya hue naghme vo ab kyuun nahin aati avaz
aaj honton pe khamoshi hi khamoshi kyuun hai?
khuub tadbir nikali hai manane ki mujhe
atish-e-soz-e-mohabbat men jalane ki mujhe
bhole-bhale ho to de do mire shikvon ka javab
tum ne kya peshtar apna na banaya mujh ko
phir yakayak na nigahon se giraya mujh ko
ye agar jhuut hai to munh se kaho chup kyuun ho
tu ne ik dil ko mire dars-e-mohabbat na diya
aur phir jaan ke dagh-e-gham-e-furqat na diya
ye agar jhuut hai to munh se kaho, chup kyuun ho
tum ne kya mujh se kisi qism ka vaada na kiya
ye agar jhuut hai to munh se kaho, chup kyuun ho?
de sake tum na mire ek bhi shikve ka javab
ab main samjha ki hai kya raz-e-ba-daman-e-hijab
vaqai tum ko nadamat hai jo khamosh ho tum
ya kisi parda-e-tasvir men ru-posh ho tum!
Leave a Reply