Ali Qaisar
main jo chahun bhi to aisa nahin hone degi
tu mujhe aur kisi ka nahin hone degi
tiri avaz jaga.egi sama.at men fusun
teri surat mujhe andha nahin hone degi
baap koi bhi musibat nahin aane dega
maan mire dil men andhera nahin hone degi
roz aa jaata hai mujh ko koi massage us ka
ya.ani vo gham ka izala nahin hone degi
ik tava.if jo jalati hai badan se chulha
apni beTi ko afifa nahin hone degi
tu miri maan kisi aur se shadi kar le
meri ghurbat to ye rishta nahin hone degi
vo juda ho bhi agar hogi saliqe se ‘ali’
ya.ani dhoke ko tamasha nahin hone degi
Leave a Reply