Marghoob Asar Fatmi
un ke ruḳh par jamal hai goya
ishq ka sab kamal hai goya
tere laa.eq nahin koi tashbih
sadgi be-misal hai goya
baat sach thi unhen garan guzri
rast-goi muhal hai goya
sab ko dutkara ab miri baari
mujh pe bhi kuchh ḳhayal hai goya
kuchh na samjhe ki kya hai ye duniya
ek makḌi ka jaal hai goya
garmi-e-ishq hind se suraj
saari duniya pe laal hai goya
jis ko sun kar hain mahv-e-hairat sab
vo ‘asar’ ḳhush-ḳhayal hai goya
Leave a Reply