poet

Un Buton Se Rabt Toda Chahiye

un buton se rabt toda chahiye

chahiye ab un ko thoda chahiye

qahba-e-duniya ko chhoda chahiye

rabt is luuli se toda chahiye

kis zaban se mohtasib tu ne kaha

saghar-o-mina ko toda chahiye

khanda-zan hai masti-e-mai-khvar par

shisha-e-sahba ko toda chahiye

us bat-e-mai ne kiya ham ko zalil

us ki gardan ko maroda chahiye

ji men hai sair-e-falak ko jaaen ham

bada-e-gul-gun ka ghoda chahiye

hai khiraman naaz se mauj-e-nasim

nikhat-e-gul ka ye ghoda chahiye

donon ankhen kyuun na hon dil ko aziiz

ahuon ka mujh ko joda chahiye

gar nishan-e-manzil-e-janan mile

phir qadam pichhe na moda chahiye

ek muddat men badhaya tu ne rabt

ab ghatana thoda thoda chahiye

zulmat-e-shab se hai zinat maah ki

zulf ko aariz pe chhoda chahiye

tuute dil ko momiya-e-lutf se

ho agar taufiq joda chahiye

kyuun shahidon ka kafan hove safed

un ke tan par laal joda chahiye

hai jo fikr-e-shah aaali silsila

alam-e-maani se joda chahiye

koh to tesha se tuuta kohkan

koshak-e-khusrav bhi toda chahiye

pad gai chakkar men kashti na-khuda

ab khuda par is ko chhoda chahiye

gar samand-e-naz par tu ho savar

zulf ka hathon men koda chahiye

khul gaya mujh se jo ik band-e-qaba

bole us ka haath toda chahiye

us ki zulfon ko sapera dekh le

gar use kalon ka joda chahiye

ganj-e-husn us ka hai rukh aur maar zulf

ganj par kalon ka joda chahiye

bad-pa hai ablaq-e-chashm-e-siyah

kya use kajal ka koda chahiye

marta bulbul ko hai kyuun baghban

kaan gul ka bhi maroda chahiye

hai chaman men amad-e-fasl-e-bahar

ab dar-e-zindan ko toda chahiye

hai bahar aai qaba-e-gul se ab

bulbulon ko laal joda chahiye

gul bhi un ko khaar aate hain nazar

hasidon ki aankh phoda chahiye

main huun aasi munh men mere vaqt-e-naza

daman-e-tar ko nichoda chahiye

rah chuka tan ke qafas men ye bahut

ruuh ke taair ko chhoda chahiye

ho agar na sar men sauda ishq ka

phir use patthar se phoda chahiye

haath men ai gul-badan mehndi laga

panja-e-marjan maroda chahiye

kaun si mushkil hai jo asan na ho

dil men istiqlal thoda chahiye

manzil-e-mulk-e-baqa men ‘mashriqi’

daman-e-nanak na chhoda chahiye

More Poems

Leave a Comment