umr bhar ankhon ka darvaza khula rahna hi tha
kab palaT aa.e koi dhaḌka laga rahna hi tha
jab ḳhulus-e-dil na shamil ho to phir kaisa milap
saath uThte baiThte bhi mas.ala rahna hi tha
chahe ham koi jatan karte magar hona tha kya
be-sabab tha jo ḳhafa us ko ḳhafa rahna hi tha
ḳhamushi se bhi mire dil men kasak rahni hi thi
aur kah kar bhi bahut kuchh bin kaha rahna hi tha
apna rasta chhoḌ ke jo chal paḌa auron ke saath
vo agar rasta bhaTakta rah gaya rahna hi tha
rang bhi aḳhir utarne men to kuchh leta hai vaqt
husn aḳhir husn tha jis ka nasha rahna hi tha
kuchh nahin to kyuun nahin kuchh bhi bina-e-iḳhtilaf
is liye bhi us ko ham se kuchh gila rahna hi tha
pasdari jab qabile ke rivajon ki na ki
phir to zahir hai qabile se juda rahna hi tha
Leave a Reply