ujaD Kar Bhi Nishan-E-Gulsitan KHud Ko Samajhta Hun

Poet

ujaḌ kar bhi nishan-e-gulsitan ḳhud ko samajhta huun

lahu deta huun is ko baghban ḳhud ko samajhta huun

kamal-e-sher rakhta huun javan ḳhud ko samajhta huun

hamesha se junun ka raz-dan ḳhud ko samajhta huun

sada main dil ki sunta huun to karta bhi huun man-mani

vo nadan huun ki phir vaj.h-e-ziyan ḳhud ko samajhta huun

nikala mujh ko jannat se ḳhuda ki mehrbani ne

lihaza aaj tak ḳhuld-ashiyan ḳhud ko samajhta huun

main zinda huun hazaron zaḳhm kha kar bhi mohabbat men

na jaane kyuun main apna mehrban ḳhud ko samajhta huun

huun varis qais ka aur asr ki laila ka huun ashiq

zamane men vafa ki dastan ḳhud ko samajhta huun

bana kar shaḳh-e-nazuk par nasheman chaar tinkon ka

chaman men sirf ahl-e-ashiyan ḳhud ko samajhta huun

main apni maut se Darta nahin huun is liye ‘jami’

sada azad zer-e-asman ḳhud ko samajhta huun

mire ash.ar ḳhud hi hain mira nam-o-nishan ‘jami’

magar main to tira nam-o-nishan ḳhud ko samajhta huun