hai kaun kis ki zaat ke andar likhenge ham
nahr-e-ravan ko pyaas ka manzar likhenge ham
ye saara shahr ala-e-hikmat likhe use
ḳhanjar agar hai koi to ḳhanjar likhenge ham
ab tum sipas-nama-e-shamshir likh chuke
ab dastan-e-lasha-e-be-sar likhenge ham
rakkhi hui hai donon ki buniyad ret par
sahra-e-be-karan ko samundar likhenge ham
is shahr-e-be-charagh ki andhi na ho udaas
tujh ko hava-e-kucha-e-dil-bar likhenge ham
kya husn un labon men jo pyase nahin rahe
sukhe hue labon ko gul-e-tar likhenge ham
ham se gunahgar bhi us ne nibha liye
jannat se yuun zamin ko behtar likhenge ham
Leave a Reply