ufuq ufuq nae suraj nikalte rahte hain
diye jalen na jalen daagh jalte rahte hain
miri gali ke makin ye mire rafiq-e-safar
ye log vo hain jo chehre badalte rahte hain
zamane ko to hamesha safar men rahna hai
jo qafile na chalen raste chalte rahte hain
hazar sang-e-giran ho hazar jabr-e-zaman
magar hayat ke chashme ubalte rahte hain
ye aur baat ki ham men hi sabr-o-zabt nahin
ye aur baat ki lamhat Talte rahte hain
ye vaqt-e-sham hai ya rab dil o nazar ki ho ḳhair
ki is samay men to saae bhi dhalte rahte hain
kabhi vo din the zamane se ashnai thi
aur aine se ab ‘aḳhtar’ bahalte rahte hain
Leave a Reply