uDa Sakta Nahin Koi Mere Andaz-E-Shewan Ko

uḌa sakta nahin koi mire andaz-e-shevan ko

ba-mushkil kuchh sikhaya hai nava-sanjan-e-gulshan ko

gareban chaak karne ka sabab vahshi ne farmaya

ki us ke taar le kar main siyunga chak-e-daman ko

bahar aate hi baTti hain ye chizen qaid-ḳhanon men

salasil haath ko paanv ko beḌi tauq gardan ko

jhaḌi aisi laga di hai mire ashkon ki barish ne

daba rakkha hai bhadon ko bhula rakkha hai savan ko

dil-e-marhum ki mayyat ijazat do to rakh den ham

tire talve-barabar hi zamin kaafi hai madfan ko

ijazat do to saari anjuman ke dil hila duun main

samajh rakkha hai tum ne hech tasirat-e-shevan ko

suluk-e-pir-e-mai-ḳhana ki ai saaqi talafi kya

ba-juz is ke dua.en do use phaila ke daman ko